శిశుగృహంలో కంటి సమస్య గుర్తింపు
ప్రత్యేక చొరవతో విజయవంతమైన శస్త్రచికిత్స
డీఎల్‌ఎస్‌ఏ కార్యదర్శి, సీనియర్ సివిల్ జడ్జి యశ్వంత్ సింగ్ ప్రత్యేక చొరవ
బాలల ఆరోగ్యం, హక్కులు, సంక్షేమంపై ప్రత్యేక శ్రద్ధ
శెనార్తిమీడియా, కరీంనగర్ :
మాటలు రాని పసిపాప బాధను గుర్తించి, ఆ చిన్నారికి మెరుగైన వైద్యం అందించేందుకు ప్రత్యేక చొరవ తీసుకోవడం మానవీయతకు నిదర్శనం. శిశుగృహంలో నిరంతరం ఏడుస్తున్న ఆరు నెలల చిన్నారి రిషి కంటి సమస్యను గుర్తించిన జిల్లా న్యాయ సేవాధికార సంస్థ కార్యదర్శి, సీనియర్ సివిల్ జడ్జి యశ్వంత్ సింగ్ వైద్య పరీక్షల నుంచి శస్త్రచికిత్స వరకు నిరంతరం పర్యవేక్షిస్తూ చిన్నారికి మెరుగైన వైద్యం అందేలా చర్యలు చేపట్టారు. ఆయన చొరవతో హైదరాబాద్‌లోని ఎల్.వి.ప్రసాద్ కంటి ఆసుపత్రిలో రిషి కుడి కంటికి శస్త్రచికిత్స విజయవంతంగా చేపట్టారు. కరీంనగర్ ప్రభుత్వ ఆసుపత్రి ఊయలలో వదిలివేయబడిన మగ శిశువు రిషిని గత నెల 2న ప్రత్యేక దత్తత కేంద్రం ఆధ్వర్యంలోని శిశుగృహం సంరక్షణలోకి తీసుకున్నారు. సెప్టెంబర్ 18న శిశుగృహం, బాలసదన్‌ ను ఆకస్మికంగా తనిఖీ చేసిన యశ్వంత్ సింగ్ సుమారు మూడు గంటలపాటు అక్కడి పరిస్థితులను నిశితంగా పరిశీలించారు. ఈ సందర్భంగా రిషి చాలాసేపటి నుంచి ఏడుస్తుండడాన్ని గమనించి, అందుకు గల కారణాన్ని సిబ్బందిని అడిగి తెలుసుకున్నారు. చిన్నారి తరచూ ఏడుస్తున్నాడని, కంటికి సంబంధించిన సమస్య ఉన్నట్లు ప్రాథమికంగా వైద్యులు తెలిపారని సిబ్బంది వివరించారు. దీంతో సమస్యను నిర్లక్ష్యం చేయకుండా తక్షణమే మెరుగైన వైద్య పరీక్షలు చేయించాలని ఆయన సూచించారు. ఆయన సూచనల మేరకు సెప్టెంబర్ 21న వైద్య నిపుణుల వద్ద రిషికి పరీక్షలు నిర్వహించారు. మరిన్ని పరీక్షలు అవసరమని వైద్యులు సూచించడంతో సెప్టెంబర్ 30న తదుపరి వైద్య పరీక్షలు చేయించారు. ఈ పరీక్షల్లో రెండు కళ్లకు సంబంధించిన తీవ్రమైన సమస్య ఉన్నట్లు గుర్తించడంతో ప్రత్యేక వైద్య నిపుణుల సలహా తీసుకోవాలని, హైదరాబాద్‌కు తీసుకెళ్లాలని వైద్యులు సూచించారు. రిషికి మెరుగైన వైద్యం అందించేందుకు జిల్లా సంక్షేమ అధికారి సరస్వతి, జిల్లా బాలల పరిరక్షణ అధికారి పర్వీన్, శిశుగృహం మేనేజర్ అపూర్వతో సమన్వయం చేసుకుంటూ యశ్వంత్ సింగ్ ప్రత్యేక శ్రద్ధ తీసుకున్నారు. అక్టోబర్ 3న చిన్నారిని హైదరాబాద్‌లోని ఎల్.వి. ప్రసాద్ కంటి ఆసుపత్రికి తీసుకెళ్లారు. అక్టోబర్ 5న గ్లూకోమాతో పాటు ఇతర కంటి సంబంధిత పరీక్షలు నిర్వహించడంతో పాటు, అవసరమైన 2డీ ఎకో పరీక్షను రెయిన్‌ బో ఆసుపత్రిలో చేయించారు. వైద్యుల సూచన మేరకు ముందుగా కుడి కంటికి శస్త్రచికిత్స చేయాలని నిర్ణయించారు. అక్టోబర్ 7న ఎల్.వి. ప్రసాద్ కంటి ఆసుపత్రిలో రిషి కుడి కంటికి శస్త్రచికిత్స విజయవంతంగా నిర్వహించారు. అక్టోబర్ 8న శస్త్రచికిత్స అనంతర వైద్య సమీక్ష పూర్తయ్యాక చిన్నారిని తిరిగి కరీంనగర్‌లోని శిశుగృహానికి తీసుకువచ్చారు. వారం రోజుల అనంతరం మరోసారి వైద్య సమీక్ష నిర్వహించనుండగా, ఎడమ కంటికి తదుపరి చికిత్సపై వైద్యుల సలహా మేరకు నిర్ణయం తీసుకోనున్నారు.
ఇతర పిల్లల ఆరోగ్యంపైనా ప్రత్యేక దృష్టి
రిషి చికిత్సకే పరిమితం కాకుండా శిశుగృహం, బాలసదన్‌లోని ఇతర పిల్లల ఆరోగ్య పరిస్థితులపైనా యశ్వంత్ సింగ్ ప్రత్యేక దృష్టి సారిస్తున్నారు. పిల్లలకు అవసరమైన వైద్య పరీక్షలు చేయించడం, దీర్ఘకాలిక ఆరోగ్య సమస్యలను గుర్తించడం, సంబంధిత అధికారులతో సమన్వయం చేసుకుని తగిన వైద్య సహాయం అందేలా చర్యలు తీసుకోవడంపై శ్రద్ధ చూపుతున్నారు. జిల్లాలో వైరల్ జ్వరాలు వ్యాపిస్తున్న నేపథ్యంలో పిల్లల ఆరోగ్య పరిస్థితిపై సిబ్బంది నుంచి రోజువారీ సమాచారం తెలుసుకుంటున్నారు. ఏదైనా సమస్య గుర్తించినప్పుడు సంబంధిత అధికారులతో మాట్లాడి తగిన చర్యలు తీసుకునేలా చొరవ చూపుతున్నారు.
న్యాయసేవలకు మానవీయ కోణం
న్యాయసేవల పరిధి కేవలం న్యాయ సహాయం అందించడానికే పరిమితం కాదు సమాజంలో రక్షణ, సంరక్షణ అవసరమైన పిల్లల హక్కులు, ఆరోగ్యం, భద్రత, సంక్షేమం పరిరక్షణలోనూ న్యాయసేవా వ్యవస్థ కీలక పాత్ర పోషిస్తుందని నిరూపించారు. రిషి చికిత్సకు తీసుకున్న చొరవ, ఇతర పిల్లల ఆరోగ్యంపై నిరంతర పర్యవేక్షణ బాలల సంక్షేమం పట్ల బాధ్యతాయుతమైన దృక్పథానికి నిదర్శనంగా నిలుస్తున్నాయి. చిన్నారి రిషి ఆరోగ్య సమస్యను గుర్తించి, మెరుగైన వైద్యం అందేలా తీసుకున్న చర్యలు, బాలల పట్ల మానవీయ దృక్పథానికి, బాధ్యతాయుతమైన ప్రజాసేవకు నిదర్శనంగా నిలుస్తున్నాయి.
