వెంకటేష్‌–త్రివిక్రమ్‌ కలయికలో సినిమా అంటే సహజంగానే ప్రేక్షకుల్లో ఆసక్తి ఉంటుంది. అందులోనూ కుటుంబ కథలకు వినోదాన్ని జోడించడంలో ప్రత్యేక గుర్తింపు తెచ్చుకున్న త్రివిక్రమ్‌ నుంచి మరో ఫ్యామిలీ ఎంటర్‌టైనర్‌ వస్తోందంటే అంచనాలు ఏర్పడటం సహజం. అయితే ‘ఆదర్శ కుటుంబం’ విషయంలో ప్రచారానికి మించిన నిర్మాణపరమైన ఒడిదుడుకులు, విడుదల ఆలస్యం సినిమాపై ప్రభావం చూపించాయి. క్రైమ్‌ నేపథ్యానికి కుటుంబ అనుబంధాలను జోడించిన ఈ చిత్రం ప్రేక్షకులను ఏ మేరకు ఆకట్టుకుంది? వెంకటేష్‌ తన నటనతో సినిమాను ఎంతవరకు నిలబెట్టారు? చూద్దాం.
ఇదీ కథ..
చిట్టిబాబు (వెంకటేష్‌) ఓ సాధారణ మధ్యతరగతి వ్యక్తి. కుటుంబ బాధ్యతలు, ఆర్థిక ఇబ్బందుల మధ్య రోజులు వెళ్లదీస్తుంటాడు. భార్య స్వర్ణ (శ్రీనిధి శెట్టి)కు ఖర్చుల విషయంలో నియంత్రణ ఉండదు. అనుకోకుండా ఆమె చేతిలో పెద్ద మొత్తంలో డబ్బు చేజారిపోవడంతో కుటుంబ కష్టాలు మరింత పెరుగుతాయి. మరోవైపు కూతురు టీనేజ్‌ సమస్యలతో ఇబ్బంది పెడుతుంటే, కొడుకు గుండె సంబంధిత అనారోగ్యంతో బాధపడుతుంటాడు. ఇలాంటి పరిస్థితుల్లో ఆ కుటుంబానికి రూ.100 కోట్ల లాటరీ తగలడంతో ఒక్కసారిగా పరిస్థితులు మారిపోతాయి. అయితే ఈ వార్త బయటకు రావడంతో ఓ ప్రమాదకరమైన దొంగల ముఠా వారి వెంట పడుతుంది. అప్పటివరకు ఆర్థిక కష్టాలతో పోరాడిన చిట్టిబాబు.. ఇప్పుడు కుటుంబ సభ్యుల ప్రాణాలను కాపాడుకోవాల్సిన పరిస్థితి ఎదుర్కొంటాడు. ఆ ముఠాను ఎలా ఎదుర్కొన్నాడు? కుటుంబాన్ని ఎలా రక్షించుకున్నాడు? అన్నది తెరపై చూడాలి.
నటీనటుల పనితీరు..
వెంకటేష్‌ ఈ సినిమాకు ప్రధాన ఆకర్షణ. చిట్టిబాబు పాత్రలో ఆయన సహజమైన నటనతో ఆకట్టుకున్నారు. ముఖ్యంగా ఇంటి వాతావరణంలో సాగే హాస్య సన్నివేశాల్లో తనదైన టైమింగ్‌తో నవ్వించే ప్రయత్నం చేశారు. యాక్షన్‌ ఘట్టాల్లోనూ ఉత్సాహంగా కనిపించారు. కథనం బలహీనపడిన సందర్భాల్లోనూ తన అనుభవంతో సినిమాను నిలబెట్టేందుకు ప్రయత్నించారు.
శ్రీనిధి శెట్టి స్వర్ణ పాత్రకు సరిపోయారు. అయితే పాత్ర పరిధి పరిమితంగా ఉండటంతో నటనను ప్రదర్శించే అవకాశాలు పెద్దగా దక్కలేదు. కూతురిగా యువినా, కొడుకుగా రాజ్‌ ప్రజ్వల్‌ తమ పాత్రలకు న్యాయం చేశారు.
సత్య తన కామెడీతో అక్కడక్కడా మంచి వినోదాన్ని అందించారు. కొన్ని సన్నివేశాల్లో ఆయన కనిపిస్తేనే ప్రేక్షకులకు కాస్త ఉపశమనం లభిస్తుంది. రావు రమేష్‌ మరోసారి తనకు అలవాటైన శైలిలో నటించారు. ప్రధాన ప్రతినాయకుడిగా ఉదయ్‌బీర్‌ సంధు బాగానే చేశారు. పోలీస్‌ అధికారి పాత్రలో నారా రోహిత్‌ కనిపించినప్పటికీ, ఆయనకు తగినంత ప్రాధాన్యం దక్కలేదు. నివేదా పేతురాజ్‌ పాత్ర గ్లామర్‌కే పరిమితమైంది. డింపుల్‌ హయాతి ప్రత్యేక పాటలో సందడి చేశారు. రఘుబాబు అక్కడక్కడా నవ్వించారు. సచిన్‌ ఖేడేకర్‌ పాత్ర నిడివి తక్కువగా ఉంది.
కథనం ఎలా ఉంది?
‘ఆదర్శ కుటుంబం’ అనే పేరు వినగానే ఓ చక్కని కుటుంబ కథను ఊహిస్తాం. కానీ తెరపై కనిపించేది కుటుంబ నేపథ్యంతో కూడిన క్రైమ్‌ డ్రామా. ఈ రెండు అంశాలను కలిపి తనదైన హాస్యాన్ని జోడించాలని దర్శకుడు త్రివిక్రమ్‌ ప్రయత్నించారు. అయితే ఆ ప్రయత్నం అన్ని చోట్లా ఫలించలేదు.
కథ ప్రారంభం ఆసక్తికరంగా ఉంటుంది. మధ్యతరగతి కుటుంబం ఎదుర్కొనే సమస్యలు, లాటరీ ద్వారా ఒక్కసారిగా వచ్చిన అదృష్టం, దాని వెనుక పొంచి ఉన్న ప్రమాదం.. ఇలా మొదటి భాగంలో కథనం ప్రేక్షకుల్లో ఆసక్తిని పెంచుతుంది. కొన్ని హాస్య సన్నివేశాలు పెద్దగా నవ్వించకపోయినా, మొత్తంగా ప్రథమార్ధం వినోదాత్మకంగానే సాగుతుంది. ఇంటర్వెల్‌ మలుపు కూడా బాగుంది.
అయితే ద్వితీయార్ధంలోనే అసలు సమస్య ఎదురవుతుంది. కుటుంబ సభ్యుల గతాన్ని వివరించే సన్నివేశాలు కథ వేగాన్ని తగ్గిస్తాయి. ఆయా పాత్రల నేపథ్యాలను పరిచయం చేయడం ద్వారా భావోద్వేగాలను పండించాలని దర్శకుడు భావించినా, అవి ప్రేక్షకులకు బలమైన అనుభూతిని కలిగించలేకపోయాయి. పైగా కథలో అప్పటివరకు ఉన్న ఆసక్తి తగ్గుతుంది.
పోలీసుల దర్యాప్తు వ్యవహారం కూడా కొత్తదనానికి దూరంగా సాగుతుంది. కొన్ని కీలక పాత్రల వెనుక ఉన్న అసలు కోణాలను ఆవిష్కరించే విధానం ఆశించిన స్థాయిలో లేదు. ముఖ్యంగా రావు రమేష్‌ పాత్రకు సంబంధించిన మలుపులు, ఆ తర్వాత వెంకటేష్‌తో సాగే సన్నివేశాలు ప్రభావం చూపించవు. కుటుంబ సభ్యుల గతానికి, ప్రస్తుత ప్రవర్తనకు మధ్య సంబంధాన్ని బలంగా చూపించడంలోనూ రచన తడబడింది.
మాటల్లో మెరుపులేవీ?
త్రివిక్రమ్‌ సినిమాలంటే గుర్తొచ్చేది చమత్కారంతో సాగే సంభాషణలు, సందర్భానికి తగ్గ మాటలతో నవ్వించడం, ఆలోచింపజేసే వాక్యాలతో ఆకట్టుకోవడం ఆయన ప్రత్యేకత. కానీ ఈ చిత్రంలో ఆ స్థాయి సంభాషణలు అరుదుగా కనిపిస్తాయి. ప్రాసల కోసం చేసిన ప్రయత్నాలు కొన్ని సందర్భాల్లో సహజత్వాన్ని దెబ్బతీశాయి. వినగానే నవ్వు తెప్పించాల్సిన మాటలు కూడా తేలిపోయాయి.
అయితే అక్కడక్కడా కొన్ని మంచి సంభాషణలు వినిపిస్తాయి. పది వేల రూపాయలను రెండుసార్లు లెక్కపెడితే ఇరవై వేలు అవుతాయని భావించే అమాయకత్వాన్ని చూపించిన తీరు, ప్రతి భావాన్ని ముఖంలోనే పలికించాలా అనే సందర్భంలో వచ్చే చమత్కారం, యుద్ధంలో ప్రాణాలు కోల్పోయే సైనికుల ప్రస్తావనతో వచ్చే మాటలు సందర్భోచితంగా ఉన్నాయి. ఇలాంటి కొన్ని సన్నివేశాల్లోనే త్రివిక్రమ్‌ రచనా శైలి కనిపిస్తుంది.
కథలోని కొన్ని కీలక పరిణామాలకు సరైన హేతుబద్ధత లేకపోవడం మరో లోపం. వంద కోట్ల లాటరీ మొత్తం నగదు రూపంలో ఇంటికి చేరడం వంటి అంశాలు సహజత్వానికి దూరంగా అనిపిస్తాయి. కథలోని మలుపులను నమ్మించేలా బలమైన నేపథ్యం అవసరమైనా, ఆ విషయంలో దర్శకుడు తగిన జాగ్రత్త తీసుకోలేదు. పలు క్రైమ్‌ చిత్రాలను గుర్తుచేసే సన్నివేశాలు కూడా కథకు సొంత గుర్తింపును తగ్గించాయి. కామెడీ కోసం చొప్పించిన కొన్ని సంభాషణలు కూడా కథకు ఏమాత్రం ఉపయోగపడలేదు.
సాంకేతిక విభాగాలు..
తమన్‌ సంగీతం ఈ సినిమాకు పెద్దగా కలిసిరాలేదు. పాటల్లో గుర్తుండిపోయే ఆకర్షణ కనిపించదు. నేపథ్య సంగీతం కూడా కీలక సన్నివేశాలకు అవసరమైన బలాన్ని అందించలేకపోయింది. రవి కె. చంద్రన్‌ ఛాయాగ్రహణం మాత్రం బాగుంది. దృశ్యాలను అందంగా చూపించడంలో ఆయన పనితనం కనిపిస్తుంది. నవీన్‌ నూలి ఎడిటింగ్‌ మరింత పదునుగా ఉండాల్సింది. ముఖ్యంగా రెండో భాగంలో అనవసరమైన సన్నివేశాలను తగ్గించి ఉంటే కథనం వేగంగా సాగేది. నిర్మాణ విలువలు ఫర్వాలేదు. పోరాట సన్నివేశాల రూపకల్పన బాగున్నప్పటికీ, రైలు నేపథ్యంలో వచ్చే ఘట్టం మాత్రం కృత్రిమంగా అనిపిస్తుంది.
చివరిగా..
వెంకటేష్‌ నటన, ప్రథమార్ధంలోని వినోదం, సత్య కామెడీ ఈ చిత్రానికి ప్రధాన బలాలు. అయితే ఆసక్తికరంగా మొదలైన కథను ద్వితీయార్ధంలో అదే స్థాయిలో కొనసాగించలేకపోవడం పెద్ద లోటు. బలహీనమైన కథనం, హేతుబద్ధతకు దూరంగా ఉన్న మలుపులు, ఆకట్టుకోని సంగీతం సినిమాపై ప్రభావం చూపించాయి. త్రివిక్రమ్‌ నుంచి ఆశించే స్థాయి సంభాషణలు కూడా పూర్తిస్థాయిలో లేకపోవడం నిరాశ కలిగిస్తుంది. కుటుంబ వినోదం ఆశించి వెళ్లేవారికి ఇది ఆ స్థాయి అనుభూతిని ఇవ్వదు.
టైటిల్ మాత్రమే ఆదర్శ కుటుంబం
