Sheesh Mahal: కేజ్రీవాల్ ‘శీష్ మహల్’ను బీజేపీ ఏం చేయబోతున్నది?

Sheesh Mahal: 2025 ఢిల్లీ అసెంబ్లీ ఎన్నికల్లో స్పష్టమైన మెజారిటీ సాధించిన బీజేపీ కొత్త ప్రభుత్వాన్ని ఏర్పాటు చేసేందుకు ముందుకు వచ్చింది. ఢిల్లీ కొత్త ముఖ్యమంత్రిగా రేఖ గుప్తా ఎన్నికయ్యారు. మరో ఆరుగురు ఎమ్మెల్యేలతో కలిసి రాంలీలా మైదానంలో ఆమె ప్రమాణం చేయనున్నారు. ప్రమాణం చేయడానికి ముందే రేఖ తన లక్ష్యాలను వెల్లడించారు. ప్రమాణ స్వీకార కార్యక్రమం తర్వాత, మంత్రులుగా ప్రమాణ స్వీకారం చేసిన ఎమ్మెల్యేలందరితో కలిసి ఆమె యమునా నది శుభ్రపరిచే పనులను పరిశీలించనున్నారు.

ఇక అరవింద్ కేజ్రీవాల్ ‘శీష్ మహల్’ గురించి రేఖ గుప్తా(Rekaha Guptha) తన ప్రణాళికలను కూడా వెల్లడించించార. ‘శీష్ మహల్’ను మ్యూజియంగా మారుస్తామని వెల్లడించారు. ప్రజలు ఇక్కడికి వచ్చి తమ డబ్బు ఎలా దుర్వినియోగం అయ్యిందో స్వయంగా తెలుసుకుంటారని పేర్కొన్నారు.

శీష్ మహల్ ను అస్త్రంగా మార్చుకున్న బీజేపీ
2025 ఢిల్లీ అసెంబ్లీ ఎన్నికల సమయంలో బీజేపీ ఆప్ అధినేత అరవింద్ కేజ్రీవాల్‌ను సీఎం నివాసం విషయంలో టార్గెట్ చేసింది. కాగ్ నివేదికను సైతం బీజేపీ తన ఎన్నికల ప్రచారం ఉదహరించింది. అరవింద్ కేజ్రీవాల్ ఆ డబ్బును అక్రమ మార్గాల ద్వారా ఖర్చు చేశారని, ముఖ్యమంత్రి సభ పునర్నిర్మాణానికి బడ్జెట్ కంటే చాలా ఎక్కువ డబ్బు ఖర్చు చేశారని బీజేపీ ఆరోపించింది. ఇంతలో, ఇతర పనులకు కేటాయించిన డబ్బు కూడా ఈ ఇంటి నిర్మాణానికి ఖర్చు చేశారని, ఇంట్లో అనేక వంట గదులు ఉన్నాయని, వాటిలో విలాసవంతమైన సౌకర్యాలు ఉన్నాయని పేర్కొంది.

శీష్ మహల్ ను ఎంచుకోవడానికి కారణాలివే..?
ఢిల్లీ ముఖ్యమంత్రి(Delhi CM)గా ఉన్న సమయంలో అరవింద్ కేజ్రీవాల్ ( Aravind Kejrival)ముఖ్యమంత్రి నివాసాన్ని పునరుద్ధరించారు. పాత సీఎం నివాసాన్ని కూల్చివేసి కొత్త నివాసం నిర్మించారు. దీనికోసం కోట్ల రూపాయలు ఖర్చు చేశారు. ముఖ్యమంత్రి భవన నిర్మాణంలో అరవింద్ కేజ్రీవాల్ నిర్ణీత బడ్జెట్ కంటే ఎక్కువ డబ్బు ఖర్చు చేశారనే ఆరోపణలు ఉన్నాయి. ఈ కాలంలో, మంత్రి మండలి అంచనా బడ్జెట్ కూడా పెరిగింది. డబ్బును ఇష్టారాజ్యంగా ఖర్చు చేశారు. సీఎం ఇంటి నిర్మాణంలో అక్రమాలు జరిగాయని కాగ్ నివేదిక కూడా పేర్కొంది. 2023లో ముఖ్యమంత్రి నివాస నిర్మాణానికి అయిన వ్యయాన్ని వెల్లడిస్తూ ఒక టీవీ ఛానెల్‌లో దీనికి ఈ పేరు పెట్టారు. ఆ నివేదిక పేరు ఆపరేషన్ శీష్ మహల్ (Operation Sheesh Mahal). ఇక్కడి నుంచి ఆ పేరు వచ్చింది. ఈ కారణంగా, బీజేపీతో పాటు ఇతర ప్రతిపక్ష పార్టీలు ముఖ్యమంత్రి నివాసాన్ని ‘శీష్ మహల్’ అని వ్యంగ్యంగా పిలుస్తున్నాయి.