by - హుజూరాబాద్ ఏసీపీ వీ మాధవి
- పోలింగ్ కేంద్రాల పరిశీలన
ACP Madhavi: పంచాయతీ ఎన్నికల సందర్భంగా ఎవరైనా ఎలక్షన్ కమిషన్ నిబంధనలు ఉల్లంఘిస్తే చర్యలు తప్పవని హుజూరాబాద్ ఏసీపీ వీ మాధవి స్పష్టం చేశారు. గ్రామ పంచాయతీ ఎన్నికల నేపథ్యంలో శంకరపట్నం మండలంలో శుక్రవారం పర్యటించారు. తాడికల్, ఎరడపల్లి, ఆర్కండ్ల, మక్తా, కేశవపట్నం, కరీంపేట్, ఇప్పలపల్లి, అంబాలపూర్ గ్రామాల్లోని పోలింగ్ బూత్‌లను రూరల్ సీఐ పీ వెంకట్‌తో కలిసి పరిశీలించారు. కేంద్రాల వద్ద ప్రజలతో మాట్లాడారు. ఎన్నికల నిబంధనలు పాటించడం ఎంత ముఖ్యమో వివరించారు.
పోలింగ్ సమయంలో రాజకీయ ప్రలోభాలు, నగదు, మద్యం, బహుమతులు ఇవ్వడం–తీసుకోవడం చట్టరీత్యా నేరమని ఏసీపీ పేర్కొన్నారు. ఓటర్లను ప్రభావితం చేసే హామీలు, బెదిరింపులు పూర్తిగా నిషేధమని సూచించారు. నిర్ణయించిన సమయం వరకు మాత్రమే ప్రచారం చేసుకోవాలని, ప్రచార వాహనాలకు అనుమతులు తప్పనిసరి తీసుకోవాలని స్పష్టం చేశారు.
పోలింగ్ కేంద్రాల పరిసరాల్లో శాంతి భద్రతలకు భంగం కలిగించొద్దని హెచ్చరించారు. గుంపులు గుమికూడడం, ఘర్షణలకు దిగడం నేరమని చెప్పారు. సోషల్ మీడియాలో తప్పుడు ప్రచారం, ద్వేషపూరిత వ్యాఖ్యలు, అభ్యంతరకర పోస్టులు పూర్తిగా నిషేధమని ప్రజలకు అవగాహన కల్పించారు.
ఎన్నికల ప్రక్రియ ఎలాంటి అవాంఛనీయ సంఘటనలు లేకుండా జరిపేందుకు పోలీసుశాఖ అన్ని రకాల భద్రతా చర్యలు చేపట్టిందని ఏసీపీ మాధవి వివరించారు. ప్రజలందరూ శాంతియుతంగా, నిబంధనలు పాటిస్తూ ఓటు హక్కును వినియోగించాలని సూచించారు.
-శెనార్తి మీడియా, శంకరపట్నం
