by - పురుషులు ముందుకు రావాలి
- కరీంనగర్ జిల్లా వైద్యాధికారి డాక్టర్ వెంకటరమణ
DMHO: కుటుంబ నియంత్రణలో పురుషుల పాత్ర కీలకమని, వేసక్టమీ శస్త్రచికిత్స పూర్తిగా సురక్షితమైనదని కరీంనగర్ జిల్లా వైద్యాధికారి డాక్టర్ వెంకటరమణ తెలిపారు. వేసక్టమీ అవగాహన పక్షోత్సవాల్లో భాగంగా శుక్రవారం కరీంనగర్ జిల్లా ప్రభుత్వ జనరల్ హాస్పిటల్‌లో నిర్వహించిన వేసక్టమీ శస్త్రచికిత్సల క్యాంపును ఆయన కుటుంబ నియంత్రణ ప్రోగ్రాం అధికారి డాక్టర్ సనా జవేరియాతో కలిసి పరిశీలించారు.
వేసక్టమీ ఆపరేషన్ చేసుకోబోతున్న, ఇప్పటికే పూర్తి చేసుకున్న అర్హులైన దంపతులతో డీఎంహెచ్ఓ మాట్లాడారు. పిల్లలు వద్దనుకున్న వారికి ఇది అత్యంత సులభమైన విశ్వసనీయమైన పద్ధతి అని పేర్కొన్నారు. ఆపరేషన్ తర్వాత ఒక వారం సూచనలు పాటిస్తే ఎటువంటి ఇబ్బందులు ఉండవని తెలిపారు. కొన్ని నెలల పాటు అదనంగా కండోమ్ వంటి తాత్కాలిక పద్ధతులను వినియోగించాలని సూచించారు. శస్త్రచికిత్సకు ముందు నిల్వ ఉండే శుక్రకణాల వల్ల గర్భం రాకుండా ఉంటుందని వివరించారు.
వేసక్టమీ పురుషుల ఆరోగ్యంపై, శక్తి లేదా పురుషత్వంపై ఎటువంటి ప్రతికూల ప్రభావం ఉండదని స్పష్టం చేశారు. కుటుంబ బాధ్యతగా, సామాజిక బాధ్యతగా పురుషులు ముందుకు వచ్చి వేసక్టమీ శస్త్రచికిత్స చేయించుకోవాలని జిల్లా వైద్యాధికారి సూచించారు. ఈ క్యాంపులో సీనియర్ సర్జన్ డాక్టర్ మహమ్మద్ అలీం వేసక్టమీ శస్త్రచికిత్సలు నిర్వహించారు.
కరీంనగర్ జనరల్ ఆసుపత్రిలో 7, సామాజిక ఆరోగ్య కేంద్రం జమ్మికుంటలో 6 .. మొత్తం 13మందికి మంగళవారం వేసక్టమీ ఆపరేషన్లు జరిగాయి. డిసెంబర్ 4వ తేదీ వరకు జిల్లా ఆసుపత్రి, ఏరియా ఆసుపత్రి హుజురాబాద్, సామాజిక ఆసుపత్రి జమ్మికుంటలో వేసక్టమీ శస్త్రచికిత్సలు కొనసాగుతాయని అధికారులు తెలిపారు.
అర్హులైన దంపతులలో పురుషులు అధిక సంఖ్యలో ముందుకు వచ్చి ఈ క్యాంపులను సద్వినియోగం చేసుకోవాలని వైద్యశాఖ పిలుపునిచ్చింది. కార్యక్రమంలో వైద్య సిబ్బంది, వేసక్టమీ కోసం వచ్చిన దంపతులు పాల్గొన్నారు.
–శెనార్తి మీడియా, కరీంనగర్
