by - మంచిర్యాల బీసీ నేతల్లో తీవ్ర అసంతృప్తి
DCC President:మంచిర్యాల నియోజకవర్గంలో కాంగ్రెస్ నుంచి ప్రాతినిధ్యం వహిస్తున్న ముగ్గురు ఎమ్మెల్యేలలో ఇద్దరు దళిత వర్గానికి, ఒకరు అగ్రవర్ణానికి చెందినవారు. ఈ కూర్పుతో స్థానిక రాజకీయ సమీకరణల్లో కొంత సమతుల్యత కనిపించినా, తాజా డీసీసీ అధ్యక్ష పదవిని అగ్రవర్ణానికి చెందిన నేతకు కేటాయించడం బీసీ వర్గాల్లో తీవ్ర అసంతృప్తికి దారితీసింది.
ఎన్నికల అనంతరం బీసీ వర్గానికి తగిన స్థానం దక్కుతుందనే నమ్మకంతో పనిచేసిన నాయకులు, కార్యకర్తలు డీసీసీ పదవి తమ వర్గానికే దక్కుతుందని భావించారు. అసెంబ్లీ స్థాయిలో బీసీ ప్రాతినిధ్యం లేకపోవడంతో జిల్లా స్థాయి పదవి ద్వారా అయినా గౌరవం లభిస్తుందని ఆశించారు. అయితే పార్టీ నిర్ణయం తమ అంచనాలను తారుమారుచేసిందని బీసీ నేతలు పేర్కొంటున్నారు.
తాము కాంగ్రెస్‌కు బలమైన ఆధారం అయినప్పటికీ పదవుల పంపకంలో నిర్లక్ష్యం జరిగిందని వారంటున్నారు. ఎన్నో ఏళ్లుగా పార్టీ బలపాటులో పోషిస్తున్న పాత్రను నాయకత్వం గుర్తించలేదని అసంతృప్తి వ్యక్తం చేస్తున్నారు. ఈ నిర్ణయం స్థానిక సామాజిక సమీకరణలపై ప్రతికూల ప్రభావం చూపుతుందని నాయకుల అభిప్రాయం.
డీసీసీ కేటాయింపు అంశం కాంగ్రెస్ అంతర్గతంగా చర్చనీయాంశంగా మారింది. బీసీ వర్గానికి న్యాయం చేయాల్సిన అవసరం ఉందని కొందరు సీనియర్ నేతలు సూచిస్తున్నట్టు సమాచారం. పరిస్థితిని శాంతింపజేయడానికి జిల్లా, రాష్ట్ర స్థాయి నాయకత్వం త్వరలోనే చర్చలు జరిపే అవకాశం ఉన్నట్లు తెలుస్తున్నది.
ఈ వివాదం ఎలా పరిష్కారమవుతుందో, బీసీ వర్గానికి పార్టీ ఎలాంటి హామీలు ఇస్తుందో అనే విషయంలో ఆసక్తి నెలకొంది.
– శెనార్తి మీడియా, పొలిటికల్ బ్యూరో
